Toshkentdan Chorvoqqa yangi yo‘l quriladi
Ishlar tanlov asosida va davlat-xususiy sheriklik mexanizmi doirasida amalga oshiriladi.
O‘zbekiston hukumati Toshkent va Chorvoq o‘rtasida yangi avtomobil yo‘lini qurishni rejalashtirmoqda. Bu haqda transport vaziri Ilhom Mahkamov “O‘zbekiston 24” telekanaliga bergan intervyusida ma’lum qildi.
Uning so‘zlariga ko‘ra, Chorvoq—Chimyon turistik zonasi faol rivojlanmoqda, bu yerga yirik investitsiyalar jalb qilinmoqda. Lekin mavjud yo‘l mashinalar oqimiga dosh berolmay qoldi.
“Muhtaram prezidentimiz tashabbusi bilan ushbu yo‘nalishda yangi avtoyo‘l qurishga qaror qilindi. Biz uni mavjud yo‘nalishga ta’sir qilmagan holda qurishni boshlaymiz”, — dedi Mahkamov.
Loyiha konsepsiyasi allaqachon taqdim etilgan. Ishlar tanlov asosida va davlat-xususiy sheriklik mexanizmi doirasida amalga oshiriladi.
Ta’kidlash kerak, Chorvoqda shisha osma ko‘prik ham paydo bo‘ladi. Inshoot qurilishi Xitoy va Turkiya mutaxassislari bilan muhokama qilinishi rejalashtirilgan.
Avvalroq Chorvoq sohilida ozarbayjonlik milliarderning dam olish maskani qurilishi boshlangani haqida xabar berilgandi. Sea Breeze loyihasi umuman ekologik ekspertizadan o‘tmagan va jamoatchilik tomonidan ma’qullanmagan. Keyinroq, 23-iyul kuni Ekologiya vazirligi rahbari Aziz Abduhakimov Chorvoq suv omborida Sea Breeze Uzbekistan loyihasiga bag‘ishlangan matbuot anjumanida nutq so‘zladi.
Vazirning aytishicha, Chorvoqdagi Sea Breeze kurorti loyihasi jamoatchilik muhokamasiga qo‘yiladi. Bundan tashqari, Aziz Abduhakimovning ta’kidlashicha, ayni paytda vazirlik loyiha bo‘yicha rasmiy hujjatlarni olmagan. Chorvoq sohilidagi Sea Breeze kurorti loyihasiga ekologik talablar qo‘yiladi. Qoidalar buzilgan taqdirda sarmoyador bilan shartnoma bekor qilinadi va yer olib qo‘yiladi.
Izohlar