Raqobat qo‘mitasi UzAuto shartnomalarida qoidabuzarliklarni aniqladi
Qonunni buzadigan ayrim bandlar shartnomalardan butunlay chiqarib tashlandi.
Raqobat qo‘mitasi UzAuto Motors dilerlik korxonalari tomonidan taqdim etilgan 8 ta band va 45 ta kichik banddan iborat shartnomalarni o‘rganib chiqib, ularda qonunbuzilish holatlarini aniqladi.
Qo‘mita ma’lumotlariga ko‘ra, UzAuto Motors shartnomalariga iste’molchilar manfaatlarini ko‘zlab muhim o‘zgartirishlar kiritilgan. Shunday qilib, shartnomaning 21 ta kichik bandi qonun hujjatlari talablariga muvofiqlashtirildi, jumladan:
- mablag‘larni qaytarish muddati — ilgari qo‘shimcha shartnoma imzolangan kundan boshlab 30 kun edi, endi muddat 10 kunga qisqartirildi;
- avtomobilni yetkazib berishning kechikishi — ilgari “Sotuvchining majburiyatlari” bo‘limida ishlab chiqaruvchiga bog‘liq bo‘lmagan ishlab chiqarishdagi vaqtinchalik tanaffus holatida avtomobilni yetkazib berish muddati 3.1-bandda belgilangan muddatdan 45 kungacha uzaytirilishi mumkinligi belgilangan edi. Endi ushbu band fors-major bo‘limiga o‘tkazildi;
- qayta shartnoma tuzish — ilgari bir yil davomida aynan bitta model uchun shartnoma tuzish fakti aniqlanganda avtomobilni yetkazib berish muddati qo‘shimcha ravishda 120 kungacha uzaytirilishi mumkin edi. Endi bu band butunlay olib tashlandi.
“Shuningdek, shartnomada sotuvchining qonun hujjatlarida belgilangan majburiyatlari aniq belgilangan. Raqobat qo‘mitasi ushbu sohada iste’molchilar huquqlarini himoya qilish bo‘yicha ishlarni tizimli ravishda davom ettirmoqda”, — deyiladi xabarda.
Avvalroq UzAuto Motors to‘g‘ridan-to‘g‘ri bo‘lib-bo‘lib to‘lashdan voz kechib, banklar orqali avtokreditlashdan voz kechgani haqida xabar berilgandi. Kompaniya yechimni moslashuvchanlik va mijozlarning istaklariga xushmuomalalik bilan izohlagan.
Izohlar