Toshkentda avariya sabab 3 mingga yaqin isteʼmolchi “svet”siz qoldi

Hozirda tarmoqdan uzilib qolgan isteʼmolchilarni boshqa manbalardan elektr energiyasi bilan taʼminlash choralari koʻrilmoqda.

Toshkent shahridagi elektr uzatish tarmogʻida yuzaga kelgan nosozlik sabab ikkita tumanda jami 2 750 ta isteʼmolchi elektr taʼminotidan uzildi. Bu haqda “Toshkent shahar elektr tarmoqlari” MChJ matbuot xizmati xabar berdi.

Qayd etilishicha, poytaxtdagi “110 kV L-D-Yu” elektr uzatish tarmogʻida nosozlik yuzaga kelgan. Buning oqibatida Sergeli va Yangihayot tumanlarining ayrim hududlari isteʼmolchilari qisman (jami 2 750 ta) elektr taʼminotidan uzilgan.

“Ayni vaqtda yuzaga kelgan nosozlikni bartaraf etish ishlari olib borilmoqda. Taʼmirlash ishlari qisqa vaqt ichida bartaraf etilib, isteʼmolchilarning elektr taʼminoti qayta tiklanadi”, deyiladi xabarda.

Qoʻshimcha qilinishicha, hozirda tarmoqdan uzilib qolgan isteʼmolchilarni boshqa manbalardan elektr energiyasi bilan taʼminlash choralari koʻrilmoqda.

Shu oʻrinda, poytaxt elektr tarmoqlari korxonasi keltirilgan noqulayliklar uchun isteʼmolchilardan uzr soʻragan.

NOVA24 YouTubeʼda. Obuna boʻling
Asosiy yangiliklar va qiziqarli videolar