O‘zbekiston xalq artisti To‘lqin Tojiyev vafot etdi

Taniqli dublyajchi, xalq artisti To‘lqin Tojiyev 88 yoshida vafot etdi.

Oʻzbekiston xalq artisti Toʻlqin Tojiyev 88 yoshida vafot etdi. Bu haqda Oʻzbek milliy akademik drama teatri xabar berdi.

“Oʻzbek Milliy akademik drama teatri ustoz sanʻatkori, oʻzbek dublyaj sanʻatining qiroli, Oʻzbekiston xalq artisti Toʻlqin Tojiyev tabarruk 88 yoshda bandalikni bajo keltirdi. Milliy teatri jamoasi marhumning oila aʻzolariga, barcha yaqinlariga taʻziya bildiradi”, deyiladi xabarda.

Toʻlqin Tojiyev 1936-yil 13-aprelda Toshkent shahrida tugʻilgan. 1959-yili A.Ostrovskiy nomidagi Toshkent teatr va rassomlik sanʻati institutining aktyorlik fakultetini tugatib, Hamza nomidagi Oʻzbek davlat akademik drama teatriga ishga kirgan.

Oʻzbekiston xalq artisti Joʻra Tojiyev xonadonida oʻsib, voyaga yetgan Toʻlqin Tojiyev 1947-yildan “Oʻzbekfilm” kinostudiyasi va respublika radiosida ishlay boshlagan. Oʻzbek Milliy akademik drama teatrida yuzdan ortiq — Bobchinskiy va Xlestakov (“Revizor”da), Ozrik (“Hamlet”), Edgar (“Qirol Lir”), Yago (“Otello”), Mansur va Jomiy (“Alisher Navoiy”), Orif (“Imon”), Abdullatif (“Mirzo Ulugʻbek”), Jontoy (“Sarviqomat dilbarim” spektakli) kabi obrazlar yaratgan.

Toʻlqin Tojiyev “Oʻzbekfilm” kinostudiyasida oʻzbekchaga oʻgirilgan mingdan ortiq xorij filmiga ovoz bergan. “Qilich va qalqon”, “Afonya”, “Ivan Vasilevich kasbini oʻzgartiradi”, “Sizdan ugina, bizdan bugina”, “Nofelet qayerda?” “Kanonir Dollasning sarguzashtlari”, “Sadoqat”, “Fillar mening doʻstlarim”, “Ram va Sham” va hokazo.

Toʻlqin Tojiyevga 1988-yilda Oʻzbekiston xalq artisti unvoni berilgan, 1997-yilda esa sanʻatkor “Doʻstlik” ordeni bilan mukofotlangan.

NOVA24 YouTubeʼda. Obuna boʻling
Asosiy yangiliklar va qiziqarli videolar