Krishtianu Ronaldu yana bir rekord qayd etdi

Ronaldu milliy jamoa safida erishilgan g‘alabalar soni bo‘yicha Ramosni ortda qoldirdi.

Portugaliya terma jamoasi hujumchisi Krishtianu Ronaldu Millatlar ligasi doirasida Polsha terma jamoasi bilan o‘yinda (5:1) dubl qayd etdi.

Uchrashuvning 72-daqiqasida “An-Nassr” hujumchisi penaltini aniq amalga oshirdi. O‘yinning 87-daqiqasida bu safar o‘yindan gol urdi. Uchrashuvda Ronaldu bir golga hammualliflik qildi.

Ronaldu uchun bu terma jamoadagi 134 va 135-gollaridir. Futbol yulduzi faoliyati davomida 910 ta gol urgan.

Ushbu bahsda Portugaliya terma jamoasi safida Rafael Leau, Bruno Fernandesh va Pedro Netu ham o‘z hisoblariga gol yozib qo‘ydi. Mehmonlarning yagona goliga himoyachi Dominik Marchuk mualliflik qildi.

Ronaldu milliy jamoasi safidagi jami 132-g‘alabasiga erishdi. Shu tariqa, 39 yoshli forvard bu borada rekordchi bo‘lib turgan Serxio Ramosni (Ispaniya safida 131 g‘alaba) ortda qoldirdi.

NOVA24 Telegramʼda. Obuna boʻling
Tezkor xabarlar va asosiy voqealar