Fargʻonada 4 nafar fuqaro fast-fuddan zaharlandi

Ular “Oshqozon-ichak faoliyatining funksiyasini buzilishi” tashxisi bilan boʻlimga yotqizilgan.

Fargʻona viloyatida 4 nafar fuqaro ovqatdan zaharlandi. Bu haqda Sanepidqoʻmita axborot xizmati xabar berdi.

Maʼlum qilinishicha, kecha, 6-noyabr kuni soat 11:30 larda Sanepidqoʻmita Fargʻona viloyati boshqarmasi Oʻzbekiston tumani boʻlimiga tuman Tibbiyot birlashmasiga qarashli Yuqumli kasalliklar boʻlimiga 4 nafar bemorni oshqozon-ichak faoliyatining funksiyasini buzilishi tashxisi bilan yotqizilganligi yuzasidan xabarnoma berilgan.

Ushbu xabarnomaga asosan Sanepidqoʻmita xodimlari tomonidan sanitariya-epidemiologik surishtiruv ishlari olib borilgan.

Surishtiruv davomida bemorlarning 2 nafari 5-noyabr kuni tushlik vaqtida tumanning Yaypanbozorbosh MFY, Ibn Sino koʻchasida, yana 2 nafar bemor esa ushbu tumanning Oqtepa MFY, Turkiston koʻchasida joylashgan fast-fud shoxobchasidan xot-dog isteʼmol qilgani aniqlangan.

Qayd etilishicha, bemorlar shifoxonada shifokorlar tomonidan tibbiy koʻrikdan oʻtkazilib, “Oshqozon-ichak faoliyatining funksiyasini buzilishi” tashxisi bilan boʻlimga yotqizilgan. Ularning umumiy holati qoniqarli deb baholanmoqda.

Ushbu holat Sanepidqoʻmita mutaxassislari tomonidan toʻliq nazoratga olingan. Oʻrganish ishlari davom ettirilmoqda, deyiladi xabarda.

NOVA24 Telegramʼda. Obuna boʻling
Tezkor xabarlar va asosiy voqealar