Markaziy bank onlayn firibgarlikning yangi turidan ogohlantirdi

Markaziy bank ijtimoiy tarmoqlar orqali regulyator nomidan firibgarlik holatlari kuzatilayotgani haqida ogohlantirdi.

Firibgarlar messenjerlar orqali fuqarolarga Markaziy bankning ramziy belgilari tushirilgan soxta hujjatlar yuborib, ularning mobil qurilmalariga zararli ilovalarni o‘rnatishga urinishmoqda, deb xabar bermoqda regulyator matbuot xizmati.

Mazkur soxta hujjatlarda go‘yoki fuqaroning mablag‘lari xavfsizligini ta’minlash uchun “moliyaviy xavfsizlik bo‘yicha mutaxassis” tomonidan ayrim amallar bajarilishi to‘g‘risidagi yolg‘on axborot ko‘rsatiladi.

Bu orqali “mutaxassis” niqobi ostidagi firibgar fuqaroning mobil qurilmasiga zararli ilovani (xususan, “Bezopasnost” nomli) o‘rnatish orqali ushbu qurilmadagi rasm va hujjatlar, SMS-xabarlar va qo‘ng‘iroqlar haqidagi ma’lumotlarni yashirin tarzda qo‘lga kiritadi.

Markaziy bank yuqoridagi kabi holatlarga duch kelingan taqdirda firibgarlarning aldovlariga aslo ishonmaslikni, ilovalarni esa messenjerlar orqali emas, balki rasmiy Google Play va App Store do‘konlaridan o‘rnatish kerakligini ma’lum qildi.

NOVA24 Instagramʼda. Obuna boʻling
Asosiy yangiliklar va qiziqarli videolar