Toshkentda 10 kunda 32 nafar “zakladchik” ushlandi

IIBBga ko‘ra ularga tegishli giyohvandlik vositalari va psixotrop moddalar xolislar ishtirokida rasmiylashtirib olingan.

Oktyabr oyining 10 kuni davomida giyohvandlik vositalarini yashirish yo‘li bilan (zakladka) tarqatgan va shunday noqonuniy faoliyat bilan shug‘ullangan 32 nafar shaxs ushlangan. Bu haqda Toshkent shahar IIBB axborot xizmati xabar bermoqda.

Aytilishicha, ularning yonidan va yashirgan joylaridan giyohvandlik vositalari va psixotrop moddalar aniqlanib, xolislar ishtirokida rasmiylashtirib olingan.

Barcha holatlar yuzasidan tergov bo‘limi tomonidan Jinoyat kodeksining 273-moddasi 5-qismi (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish) bilan jinoyat ishlari qo‘zg‘atilib, gumon qilinuvchilarga nisbatan qamoqqa olish ehtiyot chorasi qo‘llangan, tergov harakatlari davom etmoqda.

Ma’lumot uchun, 2024-yilning 20-sentyabr kunidan 20-oktyabr kuniga qadar Toshkent shahrida o‘tkazilayotgan giyohvandlik vositalari va psixotrop moddalarning noqonuniy aylanmasiga qarshi kurashish oyligi.

NOVA24 YouTubeʼda. Obuna boʻling
Asosiy yangiliklar va qiziqarli videolar