Qashqadaryodagi gaz “zapravka”da portlash yuz berdi

Favqulodda vaziyatlar vazirligi hodisa yuzasidan maʼlumot berdi.

Qashqadaryo viloyati Qarshi tumanidagi gaz “zapravka”da yongʻin, uning ortida portlash sodir boʻldi. Favqulodda vaziyatlar vazirligi axborot xizmati hodisa yuzasidan maʼlumot berdi.

Qayd etilishicha, voqea bugun, 7-oktyabr kuni soat 15:45 da Qarshi tumani Dasht MFY hududidan oʻtuvchi “Gʻuzor-Qarshi” avtomobil yoʻlida joylashgan avtomobillarga suyultirilgan gaz quyish shoxobchasida sodir boʻlgan. “Kamaz-512” rusumli avtomobilidan gaz saqlash yomkostiga gaz quyish vaqtida gaz-havo aralashmasining chaqnashi sodir boʻlgan. Chaqnash natijasida yongʻin yuzaga kelgan.

Shunga koʻra, 4 ta yongʻin-qutqaruv ekipaji soat 15:56 da hodisa joyiga yetib borib, yongʻin soat 16:00 da oʻrab olingan va soat 16:45 da oʻchirilgan.

Yongʻin tufayli shoxobcha binosining 22 kv.m maydonda tom qismi yonib zararlangan. Yongʻin oqibatida tan jarohati olgan va vafot etganlar yoʻq, deyiladi xabarda.

Qoʻshimcha qilinishicha, hozirda yongʻin sababi va moddiy zarar miqdori aniqlanmoqda. Voqea joyiga viloyat va tuman FVB rahbar xodimlari chiqqan.

NOVA24 Telegramʼda. Obuna boʻling
Tezkor xabarlar va asosiy voqealar