Хоразмда маст ҳолда 2 болани уриб юбориб, ўлимига сабабчи бўлган ҳайдовчи қамалди

Хива туманида маст ҳолатдаги ҳайдовчи йўл четидаги 3 нафар вояга етмаган болани уриб юбориб, ҳодиса жойидан қочиб кетди. Улардан 2 нафари воқеа жойида ҳалок бўлди. Суд ҳайдовчини 9 йилу 1 ойга озодликдан маҳрум этди.

Хоразм вилояти Хива туманида 2 кишининг ўлимига сабабчи бўлган ҳайдовчи 9 йилдан кўпроққа қамалди, дея хабар бермоқда Йўл ҳаракати хавфсизлиги хизмати.

Қайд этилишича, воқеа 2023 йилнинг 15 декабрь куни туманнинг Атажон Тўра маҳалласидан ўтган Хива-Янгиариқ йўлида содир бўлган. Маст ҳолатда бўлган Cobalt ҳайдовчиси йўл четидаги 3 нафар вояга етмаган пиёдани уриб юборган, уларнинг 2 нафари (Ҳасан ва Ҳусан) воқеа жойида ҳалок бўлган.

Ҳолат юзасидан Жиноят кодексининг 266-моддаси (Транспорт воситалари ҳаракати ёки улардан фойдаланиш хавфсизлиги қоидаларини бузиш) 3-қисми «а» банди, 117-моддаси (Хавф остида қолдириш) 3-қисми «а» банди билан айблов эълон қилинган ва қамоққа олинган.

Жиноят ишлари бўйича Хива тумани судида ҳайдовчи узил-кесил 3 йилга транспорт воситаларини ҳайдаш ҳуқуқидан маҳрум этилиб, 9 йил 1 ой озодликдан маҳрум қилинди. «Тўйга бориб, спиртли ичимлик ичиб, рулга ўтириб, дўстим билан уйга қайтишимда йўл четидаги икки болани уриб юборганман. Кейин воқеа жойидан кетиб қолганман. Қилган ишим учун пушаймонман», — деди ҳайдовчи.

NOVA24 Telegramʼda. Obuna boʻling
Tezkor xabarlar va asosiy voqealar