13 Sentabr 2023, 22:10 •Layfstayl

Блогер Севинч Саъдуллаева яна қамалдими? — тафсилотлар

Тармоқда блогернинг ҳибсга олингани ҳақида хабарлар тарқалди.

Севинчка тахаллуси билан ижод қилувчи блогер Севинч Саъдуллаева қамалгани ҳақида хабарлар тарқалди.

Шоу-бизнес янгиликларини ёритувчи блогер Амирхон Шамсиддинов 3 сентябрь куни Instagram саҳифасига юклаган видеода бу ҳақда гапириб ўтган.

Унинг таъкидлашича, Севинчка блогер Асад Алгонинг вафотидан кейин марҳумнинг дўсти Ойдина Қодиралиева ва унинг онасини калтаклаган, шу сабабли ҳисбга олинган.

Ички ишлар вазирлиги матбуот котиби Шоҳрух Ғиёсовнинг маълум қилишича, мазкур ҳолат 21 август куни Наманган вилояти Давлатобод туманида содир бўлган.

Мазкур жанжални уюштирган шахслар аниқланган ва уларга нисбатан Жиноят кодексининг 277-моддаси (безорилик)нинг 3-қисми билан жиноят иши қўзғатилган.

Севинчка 30 августдан бери Instagramʼдаги саҳифасига пост юкламаган. Унинг дўстлари блогер қамалгани ёки йўқлиги ҳақида аниқ ахборот тарқатмаган.

Эслатиб ўтамиз, Инстаграм тармоғида 1 миллиондан ортиқ обуначиси бўлган блогер Асадбек Арзикулов 19 июль куни Тошкент шаҳридаги тиббиёт муассасаларидан бирида вафот этганди. Бош прокуратура унинг ўлими юзасидан жиноят иши қўзғатилганини маълум қилган.

Бундан олдинроқ, 2022 йил 11 ноябрь куни, жиноят ишлари бўйича Миробод туман судида Севинч Абдуллаевага оид маъмурий ҳуқуқбузарлик тўғрисидаги иш кўриб чиқилганди. Суд якунига кўра, блогер Маъмурий жавобгарлик тўғрисидаги кодекснинг 183-моддаси (майда безорилик)да назарда тутилган ҳуқуқбузарликни содир этган деб топилиб, 5 суткага қамалган.